Во изминатото деноноќие, во Скопје се регистрирани три одделни случаи на семејно насилство, во кои жени биле нападнати од своите сопрузи, додека во Штип е пријавен случај во кој син физички го нападнал својот татко.
Според информациите од Министерството за внатрешни работи, првиот случај бил пријавен утрово околу 6:30 часот, кога 50-годишна жена од скопското подрачје пријавила дека била физички нападната од својот сопруг во нивниот дом.
Во друг случај, 48-годишна жена пријавила дека нејзиниот сопруг ѝ упатувал закани, додека во третиот инцидент, полициски службеници лишиле од слобода 26-годишен маж кој физички ја нападнал својата партнерка.
Во Штип, пак, евидентиран е тежок семеен инцидент, при што 35-годишен маж е приведен откако, според пријавата, го нападнал својот 64-годишен татко и му нанел тешки телесни повреди.
Министерство за внатрешни работи соопшти дека се работи на целосно расчистување на сите случаи и дека по завршување на постапките ќе следуваат соодветни пријави.
