Семјуел Л. Џексон еднаш беше номиниран за Оскар во неговата долга кариера, во категоријата споредна машка улога за филмот Pulp Fiction од 1994 година. Иако тогаш не ја освои статуетката, тој доби Оскар за животно дело во 2021 година.
Сепак, славниот актер откри во неодамнешното интервју за AP Entertainment додека ја промовираше својата улога во филмот на Нетфликс The Piano Lesson дека номинациите за Оскар не му се важни.
„Ние сме доволно долго во овој бизнис за да знаеме кога луѓето велат: ‘Чест е да се биде номиниран’. Најчесто тоа е натпревар на кој не сте се пријавиле. Не влегов во овој бизнис за да се докажам“.
Тој смета дека номинациите не се премногу важни бидејќи многумина не ги ни паметат победниците во категориите, пренесува Индекс.
„Те номинираат, а подоцна луѓето прашуваат: ‘За кој филм беше номиниран? Како се вика?’ А кога ќе заврши, луѓето тешко се сеќаваат кој победи“, додаде тој во интервју за AP Entertainment.
Најновиот филм на Џексон, драмата The Piano Lesson, премиерно се прикажува на Нетфликс од 22 ноември. Дејството на филмот е сместено во Питсбург во 1936 година, по Големата депресија. Ги следи животите на семејството Чарлс во домаќинството Докер Чарлс и нивното семејно наследство – пијано што ја документира историјата на семејството преку резби направени од нивниот поробен предок.
Покрај Џексон, во филмот играат Џон Дејвид Вашингтон, Реј Фишер, Мајкл Потс, Ерика Баду, Скајлар Алис Смит, Џерика Хинтон, Гејл Бин, Даниел Дедвајлер и Кори Хокинс. Филмот го режираше Малколм Вашингтон врз основа на драмата на Август Вилсон, добитник на Пулицерова награда.
Се чини дека филмот ги погоди критичарите бидејќи моментално има рејтинг од 90 проценти на Rotten Tomatoes.
