Од утре стартува имплементацијата на системот „Сејф сити – Безбеден град, безбедна држава“, преку кој Министерството за внатрешни работи ќе започне со автоматско регистрирање на сообраќајни прекршоци. Новите камери ќе детектираат брзо возење, минување на црвено светло, истечени сообраќајни дозволи и непрописно паркирање, со цел да се воспостави поуреден и побезбеден сообраќај на државно ниво.
Пробниот период ќе трае до Нова година – возачите во овој период ќе добиваат само предупредувања, без изрекување глоби. Но од јануари, системот целосно стапува во сила и секое прекршување ќе биде санкционирано согласно Законот за безбедност на сообраќајот на патиштата.
Портпаролот на МВР, Гоце Андреевски, објаснува дека системот нема да предвидува толеранција, без разлика дали прекршокот е направен во населено место или надвор од него. Сопствениците на возилата чии прекршоци ќе бидат документирани ќе добијат SMS и е-маил со записник и платен налог, а рокот за плаќање половина казна е осум дена од приемот. По истекувањето на рокот, глобата се плаќа во целост, пред да започне постапката за присилна наплата.
Плаќањето ќе може да се врши електронски, а системот веднаш ќе го извести МВР дека глобата е подмирена. Во втората фаза од проектот е планирано проширување на спектарот на прекршоци што ќе ги регистрира системот.
Воведувањето на „Сејф сити“ доаѓа по низа трагични несреќи на пешачки премини во последните години, предизвикани од возачи кои се движеле со многукратно поголема брзина од дозволената. Проблем претставува и непрописното паркирање, кое блокира тротоари, велосипедски патеки и создава дополнителна опасност за учесниците во сообраќајот.
Граѓаните имаат поделени очекувања – дел сметаат дека строгите казни конечно ќе внесат ред и ќе поттикнат повисока свесност, додека други се скептични дали технологијата сама по себе може да ги промени навиките на возачите.
Според најавите на Министерството, во почетната фаза ќе бидат покриени Скопје, Тетово, Куманово, како и автопатите и експресните патишта долж коридорите 8 и 10. До средината на следната година планот е системот да се прошири на целата територија на државата.
Камерите ќе снимаат од утре, ќе предупредуваат во текот на декември, а од јануари – ќе казнуваат. Дали овие мерки ќе донесат повисока дисциплина и помалку трагедии на патиштата, ќе стане јасно во првите недели од примената на новиот систем.
