Тимот на МААЕ ќе земе примероци од истоимената нуклеарна централа, крајбрежните води и рибниот пазар во блискиот град Иваки. Тој ќе посети и национална лабораторија во близина на Токио и ќе се сретне со јапонските власти.
Јапонија почна да испушта отпадни води од нуклеарната централа Фукушима во август 2023 година. Кина силно протестираше и го блокираше увозот на јапонски морски плодови, што ги погоди јапонските извозници на морска храна.
Јапонија вели дека испуштањето вода ги исполнува меѓународните безбедносни стандарди и дека е надгледувано од МААЕ. Јапонија ја критикуваше Кина за нејзината забрана за увоз на морска храна, барајќи итен прекин на мерката.
Кон крајот на септември, Јапонија и Кина објавија дека постигнале договор со кој ќе се олесни кинеската забрана за увоз на морска храна и ќе се вклучи Пекинг во следењето на испуштањата на отпадните води според планот на МААЕ.
Последната мисија на МААЕ, која вклучуваше експерти од Кина, не е поврзана со кинеско-јапонскиот договор, рекоа официјални лица.
