Педесетгодишниот бразилски професионален скејтер и Red Bull спортист Sandro Dias влезе во историјата со два нови Гинисови светски рекорди. Тој со својот скејтборд се спушти по фасадата на 22-катна зграда во јужниот бразилски град Порто Алегре.
Dias изведе таканаречен „drop-in“, основен скејтбординг потег каде скејтерот го поставува задниот дел од даската на работ на рампата и се наведнува нанапред за да добие брзина. За да го оствари подвигот, тој се спушти од повеќе платформи монтирани на различни висини на зградата, секоја служеше како нова точка за старт. Успешно изведе спуштања од 55, 60 и 65 метри, пред да стигне до најголемата висина – 70 метри.
За да пристапи до платформите, Dias со помош на тим експерти повеќепати се спушти од покривот со јаже. Во текот на предизвикот изведе вкупно четири спуштања, сите успешни од прв обид. Интересно е што Dias на тренинзите никогаш не го пробал последното, највисоко спуштање, што уште повеќе ја истакнува неговата ментална и физичка подготвеност.
Финалниот спуст траеше 8 секунди, при што се спушти од 70 метри висина со пад од 60 метри и достигна максимална брзина од 103,8 км/ч.
„Најважната порака што сакам да ја пренесам е никогаш да не се откажувате од своите соништа. Ова е сон стар повеќе од 13 години и денес го остваривме, поместувајќи ги границите. Благодарен сум на сите што ми помогнаа и веруваа во мене. Ова е големо достигнување за бразилскиот скејтбординг.“, изјави Dias.
Опремен со напредна Prada Linea Rossa облека и додатоци, Dias ја спои брзината со безбедноста, користејќи ткаенини со високи перформанси, дизајнирани да ги издржат екстремните услови на подвигот и да ја подобрат неговата удобност, подвижност и аеродинамична ефикасност, благодарение на современиот дизајн инспириран од човечкото тело и неговото движење.
Претставници на Гинисовата книга на рекорди беа присутни на лице место и официјално ги потврдија неговите успеси. На Dias му беа доделени сертификати за „највисок drop-in во привремен quarterpipe“ и за „најбрзо возење со скејтборд по привремен quarterpipe“.
За потребите на подвигот, долж фасадата на зградата Centro Administrativo Fernando Ferrari (CAFF) беа монтирани специјални панели од шперплоча кои ја измазнија површината и овозможија Dias да изведе чиста линија од врвот до дното. Дополнително беа поставени и безбедносни мерки како заштитни бариери слични на оние во MotoGP и 1.800 коцки од пена на крајот од рампата, за безбедно сопирање. Неговата заштитна опрема вклучуваше кацига за цело лице и штитник за кичма, што обично не се користи во скејтбордингот.
Подготовките започнаа уште во јануари 2025 година, со интензивни физички и технички тренинзи – од справување со G-сили, преку тестирања на аеродромска писта со брзини над 136 км/ч, до симулации со елеци со тежини. Во моментот на најголемото спуштање, неговото тело издржа G-сила од 3,9G, што е еквивалентно на тежина од речиси 280 килограми.
„Многу се подготвував за ова. Тренингот беше многу потежок од самиот подвиг и затоа имав толку голема самодоверба“, додаде Dias.
Препознатливата закривена архитектура на CAFF, меѓу локалното население, долго време била споредувана со огромна скејт рампа. Години наназад тоа беше само урбана легенда и инспирација за потенцијални подвизи и приказни во скејт заедницата, но сега конечно стана реалност.
Иако неодамна наполни 50 години, Sandro Dias и понатаму е легендарна фигура во скејтбординг светот. Тој во 2005 година стана првиот скејтер што изведе „900“ – две и пол ротации во воздух, трик што ја одбележа цела генерација. Во 2006 година освои злато на X Games 12, а во 2012 беше номиниран во Куќата на славните на акциони спортови.
Американскиот скејтер Ryan Sheckler, кој е негов пријател и долгогодишен конкурент, изјави:
„Sandro е скејтер до срж. Секогаш ги поместуваше границите, секогаш одеше повисоко и побрзо од сите. Да направиш нешто вакво на 50 години покажува дека скејтот е во неговото срце.“
Легендата Tony Hawk, исто така, го поздрави подвигот:
„Историјата на скејтбординг постојано се испишува со нови достигнувања. Денес Sandro скокна пет пати подалеку од она што досега го сметавме за возможно. Ова е доказ дека можеме да одиме уште понатаму од замисленото.“
