Денес од 10 до 16 часот во Младинскиот Културен Центар МКЦ, ќе се одржува Саемот „УниКомпас“ на кој учество ќе земат повеќе од 20 факултети од различни универзитети, кои пред матурантите ќе ги презентираат своите програми, услови и можности.
Ова е единствена можност за средношколците и идни студенти на едно место да се сретнат со претставници на повеќе факултети и универзитети, да дознаат за нивните студиски програми, уписни рокови, можности за стипендии и кариера, животот на кампусите, но и да учествуваат на работилници за кариерно советување и да ги истражат различните образовни и професионални патишта кои ќе ја одредат нивната иднина.
За оние средношколци кои сè уште не знаат што и каде да студираат, на настанот ќе бидат присутни професионални кариерни советници кои ќе им понудат совет и насоки за полесно да ги донесат „тешките“ одлуки. Сесиите за кариерно советување се реализираат во соработка со Националниот младински совет на Македонија (НМСМ).
Покрај ова, на „УниКомпас“ се предвидени и две работилници со психолог. Првата работилница, наменета за матурантите, е насловена „Како полесно да зачекориш во студентскиот живот?“ – целта е да се подготват матурантите за следниот чекор од нивното академско патување и предизвиците со кои би можеле да се соочат – живеење во друг град, надвор од дома, нова средина и претстојните испитни сесии.
Втората работилница е дел од „Родителското катче“ на саемот и има за цел да им обезбеди на родителите и старателите вредни сознанија, стратегии и поддршка за тоа како да им помогнат на децата полесно да ја поминат оваа клучна фаза од нивните животи.
Дел од „УниКомпас“ ќе бидат и неколку компании и организации за млади/студенти, кои ќе ги претстават своите проекти и услуги, но и можностите за кариера.
Регистрацијата за учество на саемот е во тек, а сите заинтересирани средношколци, студенти и нивните родители, може да се пријават бесплатно тука: https://docs.google.com/forms/d/e/1FAIpQLSfvCanR_G1Nb210y06jVIfCUzfkQpGlRucXRNxUUesPI52g5Q/viewform
✨Повеќе информации за настанот, како и деталната агенда, може да се најдат ОВДЕ: https://unikompas.my.canva.site/pochetna
Овој настан е поддржан од Американскиот народ преку Агенцијата на САД за меѓународен развој (УСАИД) во рамки на Активноста на УСАИД за млади кои активно создаваат можности, имплементирана од организацијата Унапредување на економиите за посилни заедници, во партнерство со Младински образовен форум (МОФ) и Центарот за претприемачи и развој на менаџери (CEED Hub) Скопје.
Настанот се реализира под покровителство на Шпаркасе Банка АД Скопје и Град Скопје
