Американската војска значително го засили распоредувањето на воени сили во близина на Иран, пренесува „Вашингтон пост“, повикувајќи се на анализи на јавно достапни податоци за летови и сателитски снимки.
Според извештајот, во текот на изминатата недела повеќе од 150 американски воени авиони биле префрлени во бази низ Европа и Блискиот Исток, откако вториот круг преговори меѓу САД и Иран на 17 февруари не донесе напредок.
Весникот наведува дека сегашното присуство на американските сили во регионот е меѓу најголемите од времето пред војната во Ирак пред повеќе од две децении. Засиленото распоредување доаѓа во период на зголемени тензии, по протестите во Иран и изјавите на американскиот претседател Доналд Трамп дека е можен напад доколку не се постигне договор за иранската нуклеарна програма.
Иранските претставници, пак, велат дека договор е можен, но дека процесот ќе бара повеќе време.
Експертите кои го следат движењето на американските сили проценуваат дека сегашниот распоред укажува на можност за повеќедневна воздушна кампања без копнена инвазија. Поранешната заменик-помошничка секретарка за одбрана за Блискиот Исток, Дана Штраул, оценува дека акумулираната воена моќ овозможува различни сценарија – од ограничени напади до интензивна воздушна операција.
Во исто време, аналитичарот Марк Кансијан смета дека доколку Вашингтон планира подолга воена кампања, ќе бидат потребни дополнителни ресурси.
Американската морнарица во моментов располага со повеќе од десет воени бродови во регионот, меѓу кои носачот на авиони „Абрахам Линколн“, девет разурнувачи и три крајбрежни борбени бродови. На пат кон Блискиот Исток е и носачот „Џералд Форд“, најголемиот носач на авиони во светот, кој пристигна во база во близина на Крит.
Според „Вашингтон пост“, ретко се случува два американски носачи на авиони да бидат истовремено во регионот, што дополнително ја нагласува сериозноста на актуелната ситуација.
