Американскиот државен секретар Марко Рубио денеска изјави дека очекува „значителен напредок“ на разговорите со украинската делегација, кои се одвиваат во Флорида. Според него, целта на разговорите не е само прекин на војната, туку создавање траен модел што ќе гарантира дека Украина ќе остане суверена, независна и политички стабилна држава.
„Станува збор за пат напред кој ќе обезбеди Украина да биде успешна. Затоа очекувам поголем помак денес“, изјави Рубио пред почетокот на средбите.
Украинската делегација ја предводи новиот главен преговарач и секретар на Советот за национална безбедност, Рустем Умеров. Тој ја презема улогата по оставката на Андриј Јермак, шефот на кабинетот на претседателот Зеленски, кој се повлече поради корупциски скандал во земјата.
По стартот на средбата, Умеров јавно им се заблагодари на Соединетите Држави за поддршката:
„САД нè слушаат, нè поддржуваат и чекорат со нас“, рече тој, нагласувајќи дека партнерството меѓу Киев и Вашингтон останува суштински столб во украинската одбрана.
Американската делегација, покрај Рубио, ја вклучува и специјалниот претставник Стив Виткоф, како и Џеред Кушнер, зет на американскиот претседател Доналд Трамп. Преговорите се одвиваат во приватниот клуб Shell Bay, проект на компанијата на Виткоф.
Претседателот Зеленски претходно најави дека на денешните разговори ќе се надградуваат резултатите од состаноците што минатиот викенд се одржаа во Женева, каде Украина ја претстави својата контрапонуда на предлозите што американскиот воен советник Дан Дрискол ги изложи пред украинското раководство пред околу две недели.
Првиот заменик-министер за надворешни работи на Украина, Серхиј Кислица, кој исто така е дел од делегацијата, преку социјалната мрежа Х порача дека процесот е сложен: „Ако употребиме метафора од метеорологијата – атмосферата е хаотичен систем во кој мали промени можат да предизвикаат огромни последици.“
Преговорите продолжуваат зад затворени врати, а исходот се гледа како еден од најзначајните политички моменти за Украина по последните промени во владата и засилената дипломатска активност меѓу Киев и Вашингтон.
