Националната метеоролошка служба на САД (NWS) соопшти дека до средата навечер, според локалното време, биле регистрирани најмалку 15 торнада во четири различни држави.
Осум лица се повредени во Кентаки и Арканзас, од кои едно е во критична состојба во округот Балард, Кентаки, информираат локалните власти.
Гувернерката на Арканзас, Сара Хакаби Сандерс, прогласи вонредна состојба во целата држава поради невремето, кое донесе и град, како и обилни врнежи, пренесува Ројтерс.
Според NWS, милиони луѓе се под предупредување за торнада и поројни поплави, а опасноста ќе продолжи и во текот на четвртокот наутро по локално време.
Во Мисури е пријавена значителна материјална штета, уништени се деловни објекти, урнати се електрични столбови, а неколку празни товарни вагони се превртени.
Метеоролошките служби издадоа предупредувања за торнада и поплави во делови од Мисури, Арканзас, Тенеси, Мисисипи, Индијана, Илиноис, Кентаки и Оклахома.
Дополнително, агенцијата предупреди дека врнежите во Арканзас, Мисури, Тенеси и Мисисипи може да предизвикаат „катастрофални“ поплави на реките.
