Американскиот министер за транспорт, Шон Дафи, изјави дека САД подготвуваат план за државно осигурување за бродовите кои поминуваат низ Хормушкиот теснец. Администрацијата на претседателот Доналд Трамп најавува и придружба на танкери низ овој клучен морски коридор.
„Мислам дека ќе видите ситуација во која ќе ги осигураме бродовите кои поминуваат низ Хормушкиот теснец“, изјави Дафи за Fox News и додаде дека во планот ќе бидат вклучени и партнерски земји. „Кога ќе имаме придружба на бродовите и осигурување, ќе видите дека нафтата повторно ќе почне да тече“.
На прашањето кога планот би можел да стапи на сила, Дафи рече дека делот за осигурување е веќе подготвен, додека американската војска проценува безбедносни услови за почеток на придружбата. „Може да биде за ден, може да биде за недела“, додаде тој.
Во меѓувреме, конфликтот меѓу САД, Израел и Иран влегува во третата недела. Хормушкиот теснец, низ кој поминува околу петтина од светската трговија со нафта, практично е затворен за танкерски сообраќај поради ескалацијата на борбите, што предизвика скок на цените на нафтата и сериозни нарушувања на енергетските пазари.
