Руски сили погодиле клучна топлана во градот Херсон, на југот на Украина, при што е предизвикана значителна материјална штета на објектот, соопшти украинската државна нафтено-гасна компанија Нафтогаз.
Според информациите од компанијата, во нападот е повреден еден вработен, кој бил ангажиран на објектот во моментот на гранатирањето. Нападнатата топлана обезбедувала греење за десетици илјади домови во Херсон, град кој и претходно беше изложен на сериозни оштетувања на енергетската и комуналната инфраструктура.
Британската агенција Ројтерс пренесува дека Русија во последниот период ги интензивира нападите врз критичната инфраструктура и енергетскиот систем на Украина, со цел да се наруши функционирањето на градовите и да се ослаби моралот на цивилното население. Овие напади се случуваат речиси четири години по почетокот на руската инвазија врз Украина.
Украинските власти предупредуваат дека ваквите удари имаат сериозни последици врз секојдневниот живот на граѓаните, особено во зимски услови, кога греењето претставува основна потреба за преживување.
