Најмалку осум лица загинаа, а 27 се повредени во руски ракетен напад врз лучката инфраструктурата во Одеса, соопшти Државна служба за вонредни ситуации на Украина. Нападот бил извршен врз јужниот украински град, кој претставува клучна точка за извоз и снабдување по Црното Море.
Според украинските служби, дел од повредените се наоѓале во автобус кој бил во епицентарот на нападот. Во експлозиите се запалиле камиони на паркинг-простор, а оштетени биле и повеќе цивилни возила.
Началникот на Одеска област, Олег Кипер, изјави дека пристаништето било погодено со балистички ракети, што дополнително укажува на интензитетот и сериозноста на нападот.
Москва засега не ги потврди независно извештаите за жртвите. Руското Министерство за одбрана, во раните утрински часови, соопшти дека претходниот ден биле погодени неидентификувани објекти од „транспортна и складишна инфраструктура што ја користи украинската армија“, како и енергетски и други капацитети поврзани со воените напори на Киев.
Од друга страна, Вооружени сили на Украина соопштија дека украински дронови извршиле напади врз руски воени и енергетски цели. Според Генералштабот, погоден бил рускиот патролен брод „Охотник“, кој патролирал во Касписко Море во близина на нафтена и гасна платформа. Обемот на штетата сè уште се утврдува.
Истовремено, нападната била и нафтено-гасна платформа на полето Филановско во Каспиското Море, со која управува Лукоил. Украинските дронови погодиле и радарски систем во областа Красносилске на Крим, полуостровот кој Русија нелегално го анектираше во 2014 година.
Немаше итна реакција од руската влада или од компанијата Лукоил. Компанијата, заедно со државниот Газпром, е меѓу руските енергетски гиганти погодени од неодамнешните американски санкции, чија цел е да се намалат приходите од нафта и гас што, според Западот, ѝ овозможуваат на Москва да ја продолжи војната.
Украинските власти со месеци ги оправдуваат долгорочните напади врз руската енергетска инфраструктура со аргумент дека таа директно ја финансира и поддржува целосната инвазија на Русија врз Украина, конфликт што наскоро влегува во петтата година, пренесува Associated Press.
