Суд во Русија го забрани прикажувањето на документарниот филм „Господин Никој против Путин“, во режија на Павел Таланкин, кој го освои Оскарот за најдобар документарец овој месец.
Одлуката е донесена по административна жалба во регионот од каде што потекнува режисерот, пренесуваат локалните медиуми.
Според судот, филмот содржи елементи на „екстремистичка симболика“ и „терористичка пропаганда“. Дополнително, се наведува дека во филмот се појавуваат малолетници без согласност од нивните родители.
Обвинителите тврдат дека документарецот промовира негативен став кон руското раководство и војната во Украина.
Надвор од Русија, филмот останува достапен за јавноста.
Таланкин, кој работел како наставник и координатор за видео во училиште во градот Карабаш, во Чељабинската област, снимал секојдневни сцени и интервјуа со ученици, фокусирајќи се на, според него, растечката милитаризација на општеството.
По снимањето, тој ја напуштил Русија и со материјалот го документирал влијанието на војната врз општеството.
Филмот бил завршен како долгометражен документарец во соработка со американскиот режисер Дејвид Боренштајн, кој живее во Копенхаген.
Познатиот руски режисер Никита Михалков го критикуваше филмот, нарекувајќи го „манифест на омраза кон Русите“ и тврдејќи дека станува збор за антисистемска продукција поддржана од западни медиуми.
