Рускиот претседател Владимир Путин прогласи велигденско примирје во Украина, кое според Кремљ треба да почне во 16 часот во сабота, 11 април, и да трае до крајот на недела, 12 април. Наредбата се однесува на прекин на борбените дејства на сите правци, додека Москва истовремено порача дека очекува и Украина да постапи исто.
Кремљ соопшти дека руската војска ќе ги запре борбените операции во овој период, но ќе остане подготвена во случај на, како што наведува, можни провокации или прекршувања на примирјето. Засега, непосредно по објавата, не беше јасно дали Киев веднаш ќе ја прифати руската најава.
Украинскиот претседател Володимир Зеленски претходно предложи слично примирје за православниот Велигден, но тогаш немало руски одговор на таа иницијатива. Истиот предлог бил дел од пошироките обиди барем привремено да се намалат нападите за време на големиот верски празник што оваа година и во Украина и во Русија се одбележува на 12 април.
Ова не е првпат Москва да прогласува кратко велигденско примирје. И лани Путин најави сличен прекин на огнот, но и тогаш двете страни меѓусебно се обвинуваа за негово прекршување, а поширок договор не беше постигнат.
