Руското Министерство за одбрана соопшти дека во текот на ноќта биле пресретнати и уништени 141 украински дрон, во еден од најобемните напади со беспилотни летала од почетокот на војната. Според официјалните информации од Москва, нападите предизвикале пожари и материјална штета во повеќе руски региони, меѓу кои и Краснодарски крај и Брјанска област.
Како што пренесува TASS, една жена била повредена во напад со дрон во Брјанската област, додека два резервоара за складирање на нафта се запалиле во пристаништето Темрјук, на брегот на Азовското Море. Пожарот, според Interfax, зафатил површина од околу 2.000 квадратни метри.
Во гаснењето на пожарот во Темрјук учествувале околу 70 лица, вклучувајќи екипи од Главната управа на Министерството за вонредни ситуации на Русија, како и 18 противпожарни возила и дополнителна техничка опрема. Регионалниот штаб за вонредни состојби соопшти дека, според прелиминарните податоци, нема жртви во овој инцидент и дека сите пожари се изгаснати.
Руското Министерство за одбрана наведува дека најголемиот број на дронови, односно 62, биле соборени над Брјанската област, 12 над Тулска област, а 11 над Калушка област. Дополнително, соопштено е дека во Шчербиновски округ во Краснодарскиот крај биле оштетени земјоделски објекти и опрема.
Регионалната оперативна група, во соопштение објавено на Телеграм, наведе дека нема дополнителни повредени лица и дека состојбата е ставена под контрола. Украинските власти засега не се изјаснија за овие тврдења на руската страна.
Нападите со беспилотни летала врз енергетската и логистичката инфраструктура длабоко во руската територија се зачестија во последните месеци, како дел од пошироката ескалација на конфликтот меѓу Русија и Украина. Москва редовно тврди дека ги неутрализира ваквите напади, додека Киев ретко директно коментира поединечни операции.
