Државниот секретар на САД, Марко Рубио, изјави дека американскиот министер за финансии Скот Бесент и министерот за енергетика Крис Рајт денеска ќе објават конкретни чекори за ублажување на растот на цените на енергенсите, предизвикан од ескалацијата на конфликтот на Блискиот Исток.
„Очекувавме дека ова може да стане проблем, а министрите Рајт и Бесент ќе започнат со спроведување мерки за да се намали влијанието“, изјави Рубио пред брифинг со лидерите на Конгресот, пренесува Ројтерс.
Мерките доаѓаат по заострувањето на тензиите меѓу САД и Иран, што предизвика скок на цените на нафтата и закани за блокада на Ормускиот теснец – клучна поморска рута за глобалното снабдување со нафта.
Американскиот Стејт департмент ги повика граѓаните на САД веднаш да напуштат повеќе од десетина земји на Блискиот Исток, меѓу кои Саудиска Арабија и Обединетите Арапски Емирати, поради безбедносни ризици поврзани со нападите врз Иран.
Помошничката секретарка за конзуларни работи, Мора Намдар, изјави дека граѓаните треба да заминат со достапен комерцијален превоз. Препораката се однесува на Бахреин, Египет, Иран, Ирак, Израел, Западниот Брег и Газа, Јордан, Кувајт, Либан, Оман, Катар, Саудиска Арабија, Сирија, Обединетите Арапски Емирати и Јемен.
Амбасадата на САД во Аман соопшти дека нејзиниот персонал ја напуштил локацијата поради закани, додека Стејт департментот активирал меѓуагенциска кризна работна група за координација на одговорот на ситуацијата.
Конкретните економски мерки на американската администрација се очекува да бидат објавени во текот на денот, додека глобалните пазари внимателно ја следат ситуацијата во Ормускиот теснец и понатамошниот развој на конфликтот.
