Во експериментите бил користен лекот нитизинон, кој вообичаено се препишува на пациенти со наследни метаболички нарушувања на аминокиселини. Овој лек го блокира ензимот одговорен за разградување на одредени супстанции во телото. Кога комарците се хранат со крв што содржи нитизинон, нивниот организам не може да ја свари, што доведува до нивна брза смрт, покажува студијата објавена во списанието Science Translational Medicine.
„Нашите истражувања сугерираат дека нитизинонот би можел да биде ново и ветувачко средство во борбата против болестите што ги пренесуваат инсектите, како што е маларијата“, изјави професорот Ли Р. Хејнс од Универзитетот Нотр Дам, еден од авторите на студијата.
Нови решенија во борбата против комарците
Досегашните методи за заштита од убоди на комарци вклучуваат носење заштитна облека, користење репеленти и заштитни мрежи. Се применува и лекот ивермектин, кој убива паразити, но неговата прекумерна употреба може да доведе до развој на отпорност и да има негативно влијание врз животната средина.
Наспроти тоа, нитизинонот се покажал како поефикасен и подолготраен. „Неговата полуживот во човечката крв е значително подолга од онаа на ивермектинот, што значи дека останува активен во телото подолг временски период – клучен фактор за безбедноста и економичноста при теренска примена“, објаснува професорот Алваро Акоста Серано, коавтор на студијата.
Овој лек бил ефикасен против сите старосни групи на комарци, вклучително и најстарите, кои најчесто ја пренесуваат маларијата. Покрај тоа, успешно ги уништил и комарците отпорни на инсектициди.
Според Хејнс, во иднина може да се користи комбинација од нитизинон и ивермектин: „Нитизинонот би можел да биде корисен во региони каде ивермектинот веќе е во широка употреба или каде што постои отпорност на него.“
Болестите што ги пренесуваат комарците – како маларија, денга, вирусот на Западен Нил, чикунгуња и жолта треска – претставуваат сè поголема закана за здравјето во Европа. Иако маларијата е искоренета од континентот пред неколку децении, климатските промени создаваат поволни услови за навлегување на инвазивни видови комарци, предупредува Европскиот центар за превенција и контрола на болести (ECDC).
Нитизинонот би можел да стане едно од клучните оружја во идната борба против овие опасни болести.
