Со првите потопли денови во март, многумина почнуваат да поминуваат повеќе време надвор – на прошетка, во парк или на тераса. Но, токму тогаш најчесто се прави една неочекувана грешка: се мисли дека заштитниот фактор е потребен дури во јуни или јули. Дерматолозите предупредуваат дека со крема за сончање треба да се започне уште во март, кога УВ-зрачењето постепено се зголемува, а кожата е чувствителна по долгата зима.
Иако температурите во март и април не се високи, интензитетот на сонцето веќе расте. Деновите се подолги, сонцето е повисоко на хоризонтот, а УВА-зраците (кои се одговорни за предвремено стареење и долгорочни оштетувања на кожата) се присутни во текот на целата година. Разликата е што напролет почнуваме повеќе да излегуваме и да ја изложуваме кожата без заштита.
Во текот на летото ризикот е највисок поради зголемениот УВ-индекс, но пролетта е периодот кога треба повторно да се воведе заштитниот фактор во секојдневната рутина. Дури и во септември и октомври сонцето може да биде доволно силно за да предизвика оштетувања, особено ако времето е ведро. Во урбани услови, и кратките изложувања (како одење до работа или седење покрај прозорец), со текот на времето придонесуваат за појава на пигментации и фотостареење.
За секојдневна употреба најчесто се препорачува крема со најмалку SPF 30 и заштита од широк спектар, односно и од УВА и од УВБ-зраци. Доколку планирате подолг престој на отворено, подобро е да се користи SPF 50. Кремата треба да се нанесе околу 20 минути пред излегување и да се обновува на секои два часа при подолго изложување на сонце.
Март е идеален момент да ја вратите оваа навика, исто како што ја менувате зимската гардероба или потешките креми со полесни формули. Наместо да чекате лето, заштитата од сонце треба да стане дел од секојдневната грижа за кожата уште од првите сончеви денови во пролетта.
