Претплатниците на YouTube TV од полноќ останаа без повеќе популарни канали во сопственост на Disney, откако двете компании не успеаја да постигнат договор за нов дистрибутивен договор.
Рокот за постигнување договор истече во четврток на полноќ, што значи дека корисниците повеќе немаат пристап до канали како што се ESPN, ABC, Disney Channel, FX, National Geographic и Freeform, пренесува CNN.
Иако преговорите меѓу двете страни продолжуваат, засега нема индикации кога би можело да дојде до обновување на емитувањето.
Взаемни обвинувања
„За жал, YouTube TV одлучи да им го ускрати на своите претплатници највредниот содржај, одбивајќи да плати фер цена за нашите канали, меѓу кои ESPN и ABC,“ изјави портпарол на Disney за CNN.
Тој додаде дека без нов договор, гледачите ќе останат без пристап до најпопуларните спортски преноси, вклучувајќи НФЛ, НБА и колеџ фудбал, при што „13 од 25 најдобри универзитетски тимови играат токму овој викенд“.
Од Google, сопственикот на YouTube, возвратија со тврдење дека „одлуката на Disney директно им штети на нашите претплатници, додека ѝ користи на нивната сопствена стриминг понуда како Hulu + Live TV и Fubo“.
Во сржта – парите
Ситуацијата не е целосно изненадување за претплатниците, кои веќе неколку дена добиваа предупредувања дека може да дојде до прекин. Како и во повеќето вакви случаи, главниот проблем се финансиските услови.
Од Disney бараат поголеми надоместоци за дистрибуција, тврдејќи дека тие ја одразуваат вистинската вредност на нивните канали, особено спортскиот гигант ESPN. „Силно инвестираме во нашата програма и очекуваме нашите партнери да плаќаат фер цена,“ соопштија од компанијата.
Од YouTube TV возвратија дека барањата на Disney би довеле до повисоки цени за корисниците и помал избор на програми.
Не е прв ваков судир
Ова не е првпат YouTube TV да се најде во ваква ситуација. Во последната година, платформата водеше неколку слични преговори со големи медиумски куќи.
Договори во последен момент беа постигнати со Paramount, Fox и NBCUniversal, додека спорот со Televisa Univision заврши со прекин на емитувањето. Во тој случај, дури и поранешниот американски претседател Доналд Трамп јавно застана во одбрана на Univision, медиум кој во последно време отворено му е наклонет.
