Еден маж е убиен, а една жена е тешко повредена во пукање што се случило синоќа во Clissold Park во Хакни, источен Лондон.
Полицијата соопшти дека повикот за инцидентот го примиле во 19:06 часот.
Жената, на возраст од четириесетина години, добила прострелни рани и била згрижена од итната медицинска служба. Засега нема точни информации за сериозноста на нејзините повреди. Мажот, исто така во четириесеттите години, бил пренесен во болница, но подоцна бил прогласен за мртов.
На местото на настанот било пронајдено огнено оружје, за кое полицијата верува дека било користено при нападот.
Полицијата го има оградено паркот и околните улици. Неколку локации се под постојан надзор. Форензичките тимови во заштитни одела собирале предмети, вклучувајќи и облека, кои биле ставени во кеси за докази. Во паркот бил поставен син шатор, а експертите го фотографирале местото на злосторството и обележувале докази со жолти маркери.
Нема поширока закана
“Сè уште сме во рана фаза на истрагата, но веруваме дека мажот и жената се познавале,” изјави детективот надзорник Оливер Рихтер.
“Случајот го третираме како изолиран инцидент и нема поширока опасност за јавноста. Истражувањето продолжува, а во областа е засилено полициското присуство,” додаде тој.
Од општината Хакни соопштија дека соработуваат со полицијата и дека паркот ќе остане затворен и денес.
