Откритието е направено со користење на синтетичка матка, која овозможила детално да се набљудува природниот процес на имплантација, нешто што досега никогаш не било документирано со ваква прецизност.
„Изненадувачки инвазивен процес“
Водечкиот автор, Самуел Охоснегрос, објасни дека ембрионот „се вкопува“ во ткивото на матката со значителна сила, за целосно да се интегрира со него.
„Овие сили се неопходни бидејќи ембрионот мора да може да го ‘освои’ ткивото на матката и да стане дел од него. Тоа е изненадувачки инвазивен процес,“ вели Охоснегрос.
Познато е дека многу жени чувствуваат болки во стомакот и благо крварење за време на имплантацијата, но досега научниците немале директна визуелна потврда како тоа изгледа.
Како го снимија процесот
Истражувачите развиле платформа за вонсоматска имплантација, користејќи гел од колаген и ткиво од матка, што овозможило ембрионот да се всади надвор од телото во контролирани услови. Со помош на флуоресцентно снимање во реално време, тие ја анализирале интеракцијата на ембрионот со околината.
Човечки vs. ембриони од глувци
Во споредбените експерименти, откриле дека глушечкиот ембрион само се прицврстува на површината, додека човечкиот ембрион целосно навлегува во маточното ткиво и почнува да расте одвнатре кон надвор.
Дополнително, човечкиот ембрион лачи ензими што го разградуваат околното ткиво и применува „влечни сили“ за да го реорганизира просторот околу себе.
Потенцијално решение за неплодност
Неуспешната имплантација е причина за околу 60% од спонтаните абортуси и е еден од водечките фактори за неплодност. Истражувањето отвора нови можности за развој на поефикасни методи за асистирана репродукција и зголемување на стапката на успешни бремености.
Коавторката Амели Годо додава:
„Ембрионот ја влече и реорганизира маточната матрица, реагирајќи на надворешни сигнали. Веруваме дека маточните контракции во живо можат да влијаат на имплантацијата.“
Ова е историски чекор во разбирањето на првите моменти од човечкиот живот и би можел да промени како се третира неплодноста во иднина.
