Израелските напади врз околу 30 ирански складишта за гориво во саботата биле значително поголеми од она што САД очекувале, што довело до првото сериозно несогласување меѓу двата сојузника од почетокот на војната пред осум дена, објави Axios.
Според американски и израелски извори, Израел однапред ја информирал американската војска за нападите, но Вашингтон бил изненаден од нивниот обем. Еден висок американски функционер изјавил дека не сметаат дека таквата операција била добра идеја.
САД се загрижени дека нападите врз инфраструктура што ја користи и цивилното население би можеле да имаат спротивен ефект, да го обединат иранското општество во поддршка на режимот и да предизвикаат раст на цените на нафтата на светските пазари.
По израелските воздушни напади избувнаа големи пожари во Техеран, а густ чад го покри главниот град. Израелските одбранбени сили соопштија дека иранскиот режим ги користи складиштата за гориво за снабдување на различни корисници, вклучувајќи ги и воените сили.
Израелски воен претставник изјавил дека нападите имале и за цел да испратат порака до Иран да престане со нападите врз израелската цивилна инфраструктура.
Иако погодените објекти не се нафтени полиња или рафинерии, американските власти стравуваат дека снимките од запалените складишта би можеле да ги вознемират пазарите и дополнително да ги зголемат цените на енергенсите.
Советник на американскиот претседател Доналд Трамп изјавил дека претседателот не е задоволен од нападот, бидејќи неговата политика е да се зачуваат енергетските ресурси, а не да се уништуваат.
Во меѓувреме, Иран предупреди дека може да одговори со слични напади низ регионот ако продолжат нападите врз неговата енергетска инфраструктура. Портпаролот на иранскиот воен штаб Кхатам ал Анбија изјави дека Техеран досега не ги гаѓал енергетските објекти во регионот, но дека тоа може да се промени.
Иранските власти предупредија дека во таков случај цената на нафтата би можела да достигне и до 200 долари за барел.
Американски официјални лица очекуваат несогласувањата меѓу Вашингтон и Тел Авив околу текот на војната да се решаваат на високо политичко ниво во наредниот период.
