Нов протест пред Филозофскиот факултет во Нови Сад се одржа во четврток навечер. Студенти, професори и граѓани стоеја пред зградата, чиј влез беше обезбедуван од кордон на Интервентната единица на полицијата, која не дозволуваше никому да влезе. Како и претходните денови, во зградата се наоѓаа деканот, полицијата и неколку „одбрани“ вработени.
Студентите претходно повикаа на протест под паролата „Нови Саде, Филозофски те вика“. Протестот започна во 19 часот, а деканот Миливоје Алановиќ веќе трет ден престојува во зградата заедно со неколку селективно повикани вработени.
Наставници, истражувачи и соработници од Филозофскиот факултет во Белград го осудија однесувањето на деканот Алановиќ и употребата на сила од страна на полицијата врз студенти, професори и граѓани. Тие истакнаа дека случувањата претставуваат ескалација на општествената криза и побараа распишување избори согласно со барањата на студентите.
„Деканот срамно избра да биде инструмент на режимот, наместо да најде решение за организација на испитниот рок во договор со студентите и наставниците, почитувајќи ја автономијата на Универзитетот“, се наведува во соопштението.
Професорите побараа деканот веднаш да поднесе неопозлива оставка и ги повикаа сите декани на високообразовни институции во Србија да застанат во одбрана на автономијата и основните вредности на академската заедница.
Претседателот Александар Вучиќ изјави дека бројот на демонстранти се намалува, бидејќи „луѓето се соочуваат со реалноста“ и додаде дека е подготвен за дијалог „дори и со насилниците“.
Извор: N1
