Тензиите во Иран продолжуваат да растат додека антивладините протести, кои зафатија сите 31 покраина, влегуваат во третата недела. Според податоци на американската организација Human Rights Activists News Agency, во судирите досега загинале најмалку 116 лица, а повеќе од 2.600 луѓе се приведени. Иранските власти, пак, тврдат дека во немирите се убиени најмалку 109 припадници на безбедносните сили, без да наведат број на жртви меѓу демонстрантите.
Протестите, кои започнаа на 28 декември на Големиот базар во Техеран поради наглиот пад на вредноста на иранскиот ријал и влошените економски услови, брзо се проширија низ целата земја. Во обид да ја задуши мобилизацијата, режимот воведе строга комуникациска блокада, додека државните медиуми за немирите обвинуваат „терористички агенти“ поврзани со САД и Израел.
Дополнителна загриженост предизвикува можноста иранските власти да се обидат да го попречат и сателитскиот интернет. Според експерти за мрежна безбедност, постои ризик режимот да се обиде да ги блокира сигналите на Starlink, сателитската интернет-услуга на компанијата SpaceX, со цел дополнително да ја изолира земјата од надворешниот свет.
Во меѓувреме, американскиот претседател Доналд Трамп изјави дека САД се „подготвени да им помогнат“ на иранските демонстранти и повторно предупреди дека Вашингтон би можел да реагира доколку продолжи насилството врз цивилите. Американските медиуми објавија дека на Трамп му биле презентирани различни сценарија за можни воени удари врз Иран, вклучително и опции за воздушни напади, иако официјални извори тврдат дека засега станува збор за рутинско планирање без најава за непосредна акција.
Со спротивставени информации, меѓусебни обвинувања и растечки меѓународен притисок, ситуацијата во Иран останува исклучително напната, без јасни знаци за смирување на кризата.
