По повод еврејскиот празник на светлината, најголемата Ханука во Европа беше поставена и подигната пред Бранденбуршката порта во Берлин. Свеќникот за Ханука има вкупно девет гранки – при што онаа во средината е таканаречената официјална, т.е. „служна“ светлина.
Првата светлина ќе биде запалена, денеска (недела) навечер, 14 декември, кога започнува еврејскиот празник. По тој повод, се очекува доаѓањето на главниот ашкеназиски рабин на Израел, Калман Меир Бер. Ашкенази Евреи се оние кои потекнуваат од Централна и Источна Европа, како и нивните потомци.
Првата прослава на Ханука ќе се одржи во Бундестагот во понеделник навечер. Меѓу другите, се очекуваат потпретседателот на Бундестагот Бодо Рамелов (лево), Федералниот комесар за борба против антисемитизмот, како и генералниот директор на Централниот совет на Евреите во Германија, Феликс Клајн.
Во среда, претседателката на Бундестагот, Јулија Клекнер (CDU), ќе ја запали четвртата свеќа на Ханука пред Бранденбуршката порта. Празникот Ханука завршува на 22 декември оваа година.
Чудо во храмот пред повеќе од 2000 години
Ханука понекогаш се нарекува „еврејски Божиќ“, но тоа е неточно. Овој празник нема никаква врска со раѓањето на Исус.
Историската позадина на овој празник, кој секогаш паѓа во темната сезона од годината, во ноември или декември, е победата на еврејските борци над странското владеење по два века во кои им било забрането да ја практикуваат својата религија. По уништувањето, Храмот во Ерусалим бил повторно освоен и осветен во 164 година п.н.е. на 25-тиот ден од месецот Кислев, деветтиот месец во еврејскиот календар.
Во чистиот храм, менората, седумгранка маслена ламба, морала повторно да се запали. Меѓутоа, бидејќи окупаторите уништиле речиси целото кошер масло, останала само една мала бокалка. Количината масло во таа бокалка би била доволна најмногу за еден ден. И биле потребни осум дена за да се добие ново масло. Сепак, се случило големо чудо: маслото горело осум дена, сè додека повторно не се произведе ново, чисто маслиново масло.
Во спомен на тоа чудо, Ханука се пали за време на празникот и се додава по една свеќа секоја вечер, сè додека сите осум светла не се запалат на осмата вечер. Свеќите се палат со благослов, секогаш со деветтата свеќа, која обично стои во средината.
Слобода на религија дури и во темни времиња
Во многу градови низ светот се организираат јавни церемонии за палење свеќи, честопати придружени со музика, танцување и заедничка прослава. Светлата во куќите светат од зајдисонце до полноќ, често на прозорецот или некаде пред куќата – секако видливи.
Зад ова стои идејата дека верската слобода е скапоцен и неопходен дел од животот – толку скапоцен што човек се бори за неа, доколку е потребно, и дека верата не се губи дури ни во темни и тешки времиња.
Нема Хаунка без крофни
Традиционално, за време на Ханука не се давале подароци. Сепак, овој празник со текот на времето станал и сè покомерцијален, па денес е вообичаено децата да добиваат подароци – сите осум дена од Ханука.
На трпезата во еврејските семејства, пред сè, има јадења пржени во масло, како што се крофни (суфганијот), пирошки и мали „плескавици“ направени од рендан компир или тиквички (латки).
