Само неколку дена по најавата за двонеделно примирје меѓу САД и Иран, договорот веќе влегува во опасна зона. Вашингтон го обвинува Техеран дека не го почитува ветувањето за пропуштање на нафтените текови низ Ормускиот Теснец, додека Иран тврди дека израелските напади врз Либан не можат да бидат одвоени од договорот за прекин на огнот.
Според Ројтерс, во петокот немало знаци дека Иран ја укинува речиси целосната блокада на теснецот, што веќе предизвика сериозен удар врз глобалните енергетски текови. Американскиот претседател Доналд Трамп изјави дека Иран „многу лошо ја врши работата“ околу пропуштањето на нафтата, додавајќи дека тоа „не е договорот“ што бил постигнат.
Во меѓувреме, израелската армија соопшти дека погодила 10 лансери во Либан откако биле истрелани ракети кон северен Израел, а Хезболах соопшти дека целел израелска воена инфраструктура во Хаифа. Паралелно со тоа, во Пакистан се подготвува првата рунда директни разговори меѓу САД и Иран, закажана за сабота, 11 април, со цел да се најде пошироко решение за конфликтот што започна со американските и израелските напади врз Иран на 28 февруари.
Иран веќе претстави предлог од 10 точки, во кој бара задржување на контролата врз Ормус, признавање на правото на нуклеарно збогатување, укинување на санкциите и прекин на војната, вклучително и во Либан. Од израелска страна, премиерот Бенјамин Нетанјаху најави дека дал насоки што поскоро да започнат мировни разговори со Либан, но со јасна цел Хезболах да биде разоружан.
Сè тоа покажува дека договорот за прекин на огнот засега не носи вистинска стабилизација, туку само краток и многу нестабилен простор за преговори. Додека Ормус останува стеснет, а фронтот со Либан активен, исходот од разговорите во Пакистан ќе биде клучен за тоа дали примирјето ќе прерасне во поширок договор или само ќе биде уште една пауза пред нова ескалација
