Русија и Украина најавија велигденско примирје кое треба да трае 32 часа, но меѓусебната недоверба и предупредувањата за можни напади оставаат отворено прашање колку ќе трае „тишината“.
Во сенка на долгата војна, Русија најави привремен прекин на огнот по повод Велигден, кој треба да стапи на сила денеска во 16:00 часот и да трае 32 часа.
Москва очекува Украина да се приклучи на примирјето, додека рускиот претседател Владимир Путин им наложи на воените сили да бидат подготвени за „спречување на провокации“.
Од украинска страна, сигналите се внимателно формулирани. Претседателот Володимир Зеленски порача дека Киев и претходно изразил подготвеност за прекин на огнот, а министерот за надворешни работи Андриј Сибига потврди дека Украина ќе дејствува реципрочно.
„Ќе видиме каде и кога ќе стапи на сила тишината и ние сме подготвени да одговориме на ист начин“, изјави Сибига.
Сепак, украинските безбедносни служби предупредуваат дека токму празничниот период може да биде искористен за саботажи и дестабилизација, наведувајќи дека такви обиди веќе се забележани.
Кремљ тврди дека примирјето има хуманитарен карактер, но во исто време испраќа и порака дека траен мир е можен „ако Киев донесе таква одлука“.
„Ние сакаме мир, а не прекин на огнот“, порачаа од Москва, оставајќи впечаток дека привремената тишина е само дел од поширока политичка стратегија.
Во меѓувреме, од украинска страна се појавуваат умерено оптимистички сигнали. Кирил Буданов, шеф на кабинетот на претседателот и главен преговарач, изјави дека гледа напредок кон можен договор и дека разговорите „се движат во таа насока“.
И покрај тоа, реалноста на теренот останува неизвесна. Примирјето можеби ќе донесе краток здив, но довербата меѓу двете страни и натаму е кревка – што значи дека секој час тишина ќе биде внимателно следен.
