Претставници на Франција, Германија и Обединетото Кралство – групата позната како Е3 – денес во Женева ќе се сретнат со делегации од Европската унија, САД и Украина за да разговараат за американскиот предлог за мир во Украина, соопштија официјални извори, пренесе Ројтерс.
Состанокот ќе се одржи на ниво на советници за национална безбедност и претставува уште една рунда интензивирани дипломатски напори во обид да се најде заеднички став околу предлог-планот што го предлага Вашингтон.
Според извор од германската влада, европската верзија на мировниот документ – направена врз основа на американскиот предлог – веќе е испратена до Киев и до администрацијата на САД.
Американски претставник потврди дека специјалниот пратеник Стив Виткоф и државниот секретар Марко Рубио денес пристигнуваат во Женева за разговорите. Истовремено е потврдено дека Русија нема да учествува на средбата.
