По повеќе од 21 час интензивни преговори, дипломатските напори меѓу САД и Иран повторно завршија без договор, сигнал кој дополнително ја зголемува тензијата на Блискиот Исток. Американскиот потпретседател Џ. Д. Венс соопшти дека американската делегација го напушта Пакистан, каде се одвиваа разговорите со посредство на пакистански претставници. Главната причина за прекинот, според Вашингтон, е одбивањето на Иран да прифати клучен услов целосно откажување од развој на нуклеарно оружје.
„Лошата вест е дека не постигнавме договор, а таа е многу полоша за Иран отколку за САД“, изјави Венс, нагласувајќи дека американската страна јасно ги поставила своите „црвени линии“.
Тој додаде дека во текот на преговорите бил во постојан контакт со американскиот претседател Доналд Трамп, и дека ставот на Вашингтон останува непроменет, спречување на каков било развој на иранско нуклеарно оружје.
„Потребна е јасна и трајна обврска од Иран дека нема да развива нуклеарно оружје“, истакна Венс, додавајќи дека САД сè уште не гледаат таква подготвеност од Техеран.
Според него, иако иранската нуклеарна програма била сериозно ослабена, суштинскиот проблем останува политичката волја на Иран за иднината.
Од друга страна, иранските државни медиуми, вклучително и телевизијата IRIB, ја префрлија вината врз Вашингтон. Тие тврдат дека „нереалните барања“ на САД довеле до колапс на преговорите, и покрај, како што наведуваат, „21 час интензивни дипломатски напори“ од иранската страна.
Во разговорите учествуваа високи претставници од двете страни – американската делегација, предводена од Венс, со учество на специјалните пратеници Стив Виткоф и Џаред Кушнер, додека Иран го претставуваа претседателот на парламентот Мохамад Багер Галибаф и министерот за надворешни работи Абас Арагчи.
Овие преговори, кои се сметаат за ретки и чувствителни контакти меѓу двете земји од Исламската револуција во 1979 година, повторно завршуваат без конкретен напредок, што отвора прашања за иднината на дипломатските обиди и стабилноста во регионот.
