Поради серија анонимни бомбашки закани повторно е нарушен железничкиот сообраќај низ цела Украина, соопштија властите вчера.
Полицијата информираше дека патнички воз кој се движел кон Запорожје бил принуден да запре во селото Бурштин, каде што патниците биле евакуирани на безбедно растојание додека стручни служби и кучиња трагачи ги претресувале вагоните во потрага по експлозив. Откако било дадено одобрение за продолжување, возот го продолжил патувањето.
Според новинската агенција УНИАН, неколку други возови во различни региони исто така биле запрени и претресени поради слични закани. Меѓу нив бил и возот на линијата Днипро – Будимпешта, кој ја поврзува Украина со Унгарија.
Слични инциденти се пријавени и во последните неколку дена, иако не била пронајдена ниту една експлозивна направа во засегнатите возови, вклучително и на меѓународните линии. Сепак, превентивните проверки предизвикале доцнења. Властите досега немаат понудено информации за можните мотиви или потекло на заканите.
