Катастрофални поплави и свлечишта го зафатија северниот дел на индонезискиот остров Суматра, оставајќи зад себе речиси 1.000 загинати и скоро еден милион раселени жители. Националната агенција за управување со катастрофи (BNPB) денес соопшти дека од четврток досега регистрирани се 961 жртва, 234 исчезнати лица и околу 5.000 повредени, ширум покраините Аче, Северна Суматра и Западна Суматра.
Властите потврдија дека се оштетени над 156.000 домови, а 52 окрузи и градови остануваат тешко погодени. Многу области сè уште се непристапни поради уништените патишта, свлечиштата и високото ниво на вода.
Според директорот на BNPB, до неделата навечер 975.075 жители биле принудени да побараат засолниште во привремени центри. Најкритична е состојбата во покраината Аче, каде бројот на раселени лица надминува 900.000. Во деловите на централното планинско подрачје поплавната вода и понатаму оневозможува нормално функционирање и пристап до заедниците.
Иако водата полека се повлекува во некои крајбрежни региони, штетите се огромни. Индонезискиот претседател Прабово Субианто лично ги посети најпогодените подрачја во Аче, по што свика итен состанок со владините министри, воени команданти и покраински власти со цел координација на мерките за помош и обновување.
Сезоната на обилни монсунски дождови, која во Индонезија трае од ноември до април, редовно предизвикува поплави, но експертите предупредуваат дека последниве години дефорестацијата, нерегулираниот урбан развој и уништените речни корита драматично го зголемуваат ризикот за локалното население. Организациите за заштита на животната средина одамна укажуваат дека ваквите природни непогоди стануваат сè поразорни токму поради човековото влијание врз екосистемите.
Метеоролошките служби најавуваат дека во наредните денови нови силни врнежи ќе го погодуваат западниот и северниот дел на островот, што дополнително ја зголемува загриженоста на властите и мештаните.
