Премиерот на Албанија, Еди Рама, соопшти дека последиците од обилните врнежи од дожд се сериозни и зафатија голем дел од земјата. Според официјалните податоци презентирани на состанок на Меѓуминистерскиот комитет за цивилни вонредни ситуации, досега се евидентирани 1.587 поплавени домови и други објекти, како и 13.211 хектари земјоделско земјиште под вода.
Од поплавените подрачја евакуирани се 339 лица и 51 семејство, а регистрирана е и една жртва – вработен во комуналната служба на општина Драч.
Рама нагласи дека количината на врнежи достигнала и до 300 милиметри на квадратен метар, што е повеќе од просечната месечна количина дожд, но концентрирана во период од само три до четири дена. Според него, ваквите екстремни временски појави се директна последица на климатските промени и стануваат сè почести.
„Овој феномен повеќе не е исклучок, туку нова реалност. Секој граѓанин што претрпел штета ќе биде обештетен“, изјави Рама.
Вицепремиерката и министерка за инфраструктура и енергетика, Белинда Балуку, изјави дека состојбата со снабдувањето со електрична енергија е речиси целосно стабилизирана. Таа посочи дека над 1.600 вработени од 2 јануари се ангажирани на терен, особено во најпогодените региони Тирана, Драч, Валона, Ѓирокастро и Елбасан.
Министерката за внатрешни работи, Албана Кочиу, информираше дека низ целата земја се распоредени околу 5.500 полициски службеници со 700 возила, додека противпожарната служба ангажирала 720 пожарникари, 55 возила и 22 пумпи во критичните подрачја.
Иако врнежите во поголем дел од земјата се намалени, состојбата и понатаму внимателно се следи, особено во регионот на Драч.
