Полска почнува да гради нуклеарна централа во близина на Балтичкото Море, меѓу другото, за да го запре производството на електрична енергија со употреба на јаглен. Брисел даде зелено светло, пишува Дојче веле .
Одлука на Европската комисија
Кога полскиот премиер Доналд Туск ја објави одлуката од Брисел на своите сонародници, звучеше како да им доставува ран божиќен подарок. Европската комисија ѝ дозволува на Полска да кофинансира изградба на нуклеарна централа. „Сега можеме да започнеме со изградба со полна брзина – и тоа веќе во декември“, рече Туск.
Изградбата на првата полска нуклеарна централа треба да чини повеќе од 40 милијарди евра. Речиси една третина од таа сума ја презема државата. Парите не доаѓаат од Европската Унија, туку од полските даночни обврзници, но за ова беше потребна дозвола од Брисел. Електраната треба да се изгради северозападно од Гдањск на брегот на Балтичкото Море, околу 250 километри од границата со Германија.
Општествен консензус околу нуклеарната енергија
Полското општество, длабоко поделено по многу прашања, е претежно согласно кога станува збор за нуклеарната енергија. Во анкета од минатата година, повеќе од 90 проценти од испитаниците ја поддржаа изградбата на полски нуклеарни централи, нагласува Јакуб Виех, новинар за енергетски прашања на интернет-порталот „Енергетика24“. „Постои партиски консензус за нуклеарната политика во Полска – во општеството и во политиката. Нема релевантна партија во Полска што е против нуклеарната енергија“.
Замена на јагленот со нуклеарна енергија
Полјаците, свесни за климатските промени, исто така имаат позитивен став кон нуклеарната енергија. Тоа треба да помогне да се оттргнеме од производството на електрична енергија од јаглен, кое сè уште го покрива најголемиот дел од потребите на земјата, вели енергетскиот аналитичар Војчех Јакобик. „Со нуклеарната енергија, истовремено постигнуваме две од нашите климатски и енергетски цели: безбедност на снабдувањето и намалување на емисиите на CO2.“
Дури и во непосредна близина на планираната електрана, мнозинството од населението ја поддржува нејзината изградба, иако поддршката таму не е толку силна како во остатокот од земјата. Ова е поврзано, на пример, со можното влијание врз туризмот.
