Полскиот претседател Карол Навроцки денес демонстративно го откажа планираниот билатерален состанок со унгарскиот премиер Виктор Орбан, како реакција на Орбановата средба со рускиот претседател Владимир Путин во петокот. Навроцки сепак ќе патува во Унгарија, но единствено за да присуствува на самитот на претседателите на Вишеградската група, кој ќе се одржи на 3 декември во Естергом.
„Претседателот Карол Навроцки доследно се залага за мирно политичко решение на војната во Украина, која ја започна Руската Федерација. Безбедноста на Европа бара солидарно дејствување, вклучително и во енергетскиот сектор. Поради посетата на премиерот Виктор Орбан на Москва и нејзиниот контекст, претседателот Навроцки реши да ја ограничи програмата на својата посета исклучиво на самитот на Вишеградската група“, соопшти претседателскиот советник Марчин Пшидаќ.
Навроцки требаше да остане во Унгарија и по самитот и да ја продолжи посетата со официјален состанок со премиерот Орбан. Но средбата е повлечена од агендата поради Орбановите разговори со Путин, на кои главна тема, според унгарските медиуми, биле испораките на руска нафта и гас за Унгарија.
Одлуката на полскиот претседател предизвика реакции и во Варшава. Полскиот премиер Доналд Туск го критикуваше едновремениот синџир средби — Путин–Орбан и Орбан–Навроцки — предупредувајќи дека тоа испраќа лош политички сигнал среде комплексните европски преговори и политичката криза во Киев. „Орбан оди на средба со Путин, Навроцки со Орбан. Хаос во преговорите околу планот Виткоф, а во Киев политичка криза. Фатална комбинација“, порача Туск на мрежата Икс.
Шефот на полската дипломатија Радослав Шикорски, пак, му порача на Навроцки дека, доколку веќе има намера да се сретне со Орбан, треба да настојува Унгарија да престане да ги блокира европските санкции кон Русија и исплатата на европските средства што Полска треба да ги добие како компензација за воената помош испратена во Украина.
