Иако тврди дека спорните компоненти не стигнале до флотата во употреба, Ербас признава нова техничка грешка на својот најпродаван авион. Со пад на акциите за 11 проценти и зголемување на безбедносните прашања, А320 влегува во најтешкиот период во последната деценија.
Производителот на авиони Ербас соопшти дека открил проблем со квалитетот на металните панели на трупот на некои модели на А320, само неколку дена откако голем број авиони беа приземјени поради софтверски проблем.
Иако досега нема индикации дека некој од спорните панели е инсталиран во авионите што моментално се користат, вредноста на акциите на најголемиот светски производител на авиони падна за дури 11 проценти.
Акциите дополнително паднаа по веста за нов технички проблем, кој се случи кратко откако околу 6.000 авиони А320 беа приземјени поради итно ажурирање на софтверот.
„Ербас потврдува дека идентификувал проблем со квалитетот во врска со голем број метални панели за А320“, соопшти компанијата, нагласувајќи дека изворот на дефектот е идентификуван, исправен и дека панелите што моментално се произведуваат ги исполнуваат сите потребни стандарди.
Портпаролот на производителот изјави дека проблемот потекнува од еден од надворешните добавувачи, чие име компанијата не сакаше да го објави.
Ербас користи комбинација од внатрешни и надворешни добавувачи за своите аероструктури: предниот дел од трупот на А320 главно се произведува во Франција, а задниот дел во Германија. Горните панели најчесто се произведуваат во самата компанија, додека остатокот доаѓа од неколку различни производители.
Ова е уште еден во низата проблеми што влијаат на најпродаваниот модел на Ербас.
Имено, неодамна беше донесена одлука за привремено повлекување на околу половина од целата флота на А320, околу 6.000 авиони, откако минатата недела беше посочена можна, но сè уште непотврдена врска помеѓу дефект на софтверот и ненадејното губење на надморската височина на еден од авионите.
Замена на софтвер на 6.000 авиони
По консултации со регулаторите, Ербас издаде предупредување во петокот со кое им наложи на авиокомпаниите привремено да ги суспендираат летовите додека софтверот не се врати на претходната верзија.
Решението вклучуваше инсталирање на постара верзија на софтверот што го контролира аголот на носот на авионот.
Компанијата објави дека замената е извршена на речиси сите авиони, оставајќи само околу 100 авиони од вкупно 6.000 на кои треба да се заврши постапката. Ербас им се извини на своите партнери за доцнењата и оперативните проблеми предизвикани од масовната замена на софтверот.
