Раководството на Фолксваген ќе ги намали своите плати за вкупно повеќе од 300 милиони евра до 2030 година, изјави Гунар Килијан, член на управата на автомобилскиот гигант задолжен за човечки ресурси.
Ова намалување на платите е дел од мерките за реструктурирање на компанијата која се соочува со значителни предизвици.
Членовите на управниот одбор на Фолксваген ќе добијат поголемо намалување на платите во споредба со останатите вработени, пропорционално на нивните приходи, изјави Килијан за локалниот весник Braunschweiger Zeitung, пренесува Reuters.
Фолксваген се соочува со потешкотии поради предизвикувачките услови во европската автомобилска индустрија, зголемениот притисок од кинеските конкуренти во областа на електричните возила и бавната адаптација кон промените на автомобилскиот пазар.
За да ја врати конкурентноста, управата најави реструктурирање на бизнисот и промена на моделот на работа кој со децении нудел бројни бенефиции и стабилност за вработените.
Овие најави предизвикаа незадоволство кај работниците и штрајкови, поради што управата и синдикатот IG Metall водеа повеќенеделни преговори кои завршија на 20 декември.
Резултатот од преговорите е дека фабриките на Фолксваген во Германија нема да се затворат, но бројот на вработени во Германија ќе се намали за 35.000 до 2030 година. Фолксваген моментално вработува околу 130.000 луѓе.
Со оваа и други мерки за оптимизација на трошоците, компанијата очекува да заштеди 1,5 милијарди евра годишно.
