Готвењето тестенини изгледа едноставно, но и кај ова основно јадење често се прават грешки што влијаат на вкусот и текстурата. Со неколку мали промени може значително да се подобри крајниот резултат и тестенините да бидат совршено зготвени и подготвени за сосот.
Една од најчестите грешки е додавањето масло во водата. Иако многумина веруваат дека така тестенините нема да се лепат, маслото останува на површината и спречува сосот убаво да се соедини со нив. Наместо тоа, доволно е повремено мешање и користење квалитетен сос.
Подеднакво важно е водата да биде доволно солена. Таа треба да има вкус на лесно зачинета супа, бидејќи тоа е единствениот начин тестенините да добијат вкус одвнатре. Несолена вода резултира со блед и неутрален вкус кој подоцна тешко се коригира.
Честа грешка е и недоволното проверување на степенот на варење. Тестенините треба да се пробаат неколку минути пред времето означено на пакувањето и да се внимава да останат „ал денте“, односно цврсти при гризење, но не и тврди.
Многумина ја истураат целата вода по варењето, без да зачуваат малку од неа. Токму таа скробна вода помага сосот да стане покремаст и подобро да се врзе со тестенините, создавајќи поуедначена текстура.
Дополнително, плакнењето тестенини по варењето е непотребно, освен ако се подготвуваат за ладна салата. Со плакнењето се отстранува скробот што му помага на сосот да се залепи, па јадењето може да изгледа суво и помалку вкусно.
