Говорејќи пред ученици во градот Соколов, Павел објасни дека Русија постојано ја тестира решеноста на НАТО и дека нејзините активности претставуваат проверка не само на одбранбените системи на земјите-членки, туку и на нивната подготвеност да реагираат.
„Постојат народи на кои доволно им е да им се каже да не го прават тоа, но кај некои мора нешто навистина да се случи за да сфатат дека одат по погрешен пат,“ рече Павел.
Тој предупреди дека Русија ја почитува единствено силата, додека воздржаноста ја толкува како слабост. „Во нивното разбирање, слабиот не заслужува ништо друго освен да биде понижен,“ додаде чешкиот претседател.
Павел нагласи дека не секое нарушување на воздушниот простор треба да се санкционира со насилна мерка, но дека, ако ситуацијата продолжи да се повторува, НАТО ќе мора да покаже дека постојат јасни граници. „Ако продолжат со упадите, ќе мора еднаш тоа да го направиме за Русија да сфати дека постојат правила што не смеат да се прекршуваат,“ рече тој.
Во разговорот со учениците, Павел потсети и на времето кога бил претседател на Воениот комитет на НАТО, споменувајќи дека Русија тогаш постојано го нарушувала турскиот воздушен простор. „Провоцираа, тестираа колку можат да одат далеку, сè додека Турција, по десеттиот упад, не се одлучи да собори неколку авиони — и потоа завладеа мир,“ објасни тој, додавајќи дека Москва тогаш сфатила дека се соочува со решителен противник.
Според најновите анкети, Петр Павел е најпопуларниот чешки претседател по Вацлав Хавел, додека зад него се рангирани Вацлав Клаус и поранешниот претседател Милош Земан, кого граѓаните го оцениле како најнепопуларен.
