Пакомак го отвори пријавувањето за наградниот конкурс „Trash for Art 2026“, наменет за уметнички дела изработени од отпад. Повикот е отворен за сите еко-свесни граѓани, а конкурсот ќе трае до 17 март.
Конкурсот е отворен за градинки, основни училишта, поединци и други организации. Делата ќе се натпреваруваат во три главни категории: градинки, основни училишта и поединци/организации.
За секоја категорија се предвидени по три парични награди: 30.000 денари за прво место, 20.000 денари за второ и 10.000 денари за трето место. Уметничките дела треба да бидат изработени од најмалку 10 парчиња амбалажен отпад, од ист или различен тип, и не треба да надминуваат висина од 150 сантиметри.
Годинава се предвидени и две специјални награди. Првата е за дела изработени од електронски отпад, односно од најмалку три делови електронски отпад или отпадни батерии. Наградниот фонд за оваа категорија е идентичен со оној во главните категории.
Втората специјална награда е наменета за најдобрите дела изработени исклучиво од амбалажа на Алкалоид, кој е специјален учесник и поддржувач на „Trash for Art 2026“.
Делата треба да бидат доставени на 16 и 17 март 2026 година, од 9:00 до 18:00 часот, во локалот „Лабораториум“, кој се наоѓа зад Работничкиот универзитет „Кочо Рацин“.
Повеќе информации за конкурсот се достапни на официјалната веб-страница на Пакомак и на неговите профили на социјалните мрежи.
