Пакистан денеска се подготвува да биде домаќин на разговори меѓу делегации на САД и Иран за војната и состојбата во Ормускиот Теснец, но преговорите влегуваат во крајно нестабилна атмосфера, пренесува Euronews. Иако Исламабад продолжува со безбедносните подготовки, учеството на Техеран останува неизвесно по новата размена на оган меѓу Израел и Хезболах, што дополнително го разниша и онака кревкото двонеделно примирје.
Според Euronews и AFP, разговорите треба да опфатат неколку чувствителни точки, меѓу кои и иранското нуклеарно збогатување, како и слободниот проток на трговијата низ Ормускиот Теснец. Токму тој морски теснец останува една од клучните спорни точки, бидејќи и покрај примирјето пловидбата таму и натаму е силно нарушена.
Иран веќе испрати порака дека неговото учество во разговорите ќе зависи од тоа дали САД ќе го почитуваат примирјето „на сите фронтови“, особено во Либан. Портпаролот на иранското Министерство за надворешни работи Есмаил Багаеи изјави дека патувањето на делегацијата сè уште не е финализирано, а ирански претставници оценија дека израелските напади врз Либан ги прават разговорите во Пакистан „бесмислени“.
Во меѓувреме, Пакистан не запира со подготовките. Во Исламабад е засилено обезбедувањето, а хотелот што треба да ги смести делегациите е испразнет од редовните гости. Дел од улиците во главниот град биле затворени и поради дводневниот државен празник, што дополнително ја засили сликата на град во состојба на висока готовност пред можните разговори.
Паралелно со ова, Стејт департментот најави и средба меѓу Израел и Либан во Вашингтон следната недела, иако ниту израелската, ниту либанската страна засега јавно не ја потврдиле. Либански претставник за AFP изјавил дека Бејрут би влегол во разговори со Израел само ако претходно има примирје.
Американската делегација, ако разговорите се одржат, треба да ја предводи потпретседателот Џеј Ди Венс, заедно со специјалниот пратеник Стив Виткоф и Џаред Кушнер. Но, и пред тој момент е јасно дека ова нема да бидат обични разговори, туку обид да се одржи договор што веќе покажува длабоки пукнатини и на терен и во дипломатијата.
