Само еден танкер со нафтени деривати и пет други товарни бродови поминале низ Ормускиот Теснец во првите 24 часа од договореното примирје меѓу САД и Иран, покажувајќи дека клучната енергетска рута и натаму е далеку од нормално функционирање. Веста доаѓа ден пред најавените директни разговори меѓу Вашингтон и Техеран во Пакистан, во момент кога договорот за двонеделно примирје веќе покажува сериозни недостатоци.
Пред почетокот на конфликтот, низ Ормус вообичаено минувале околу 140 бродови дневно, а сега сообраќајот останува речиси замрзнат поради неизвесноста, строгите ирански ограничувања и стравот кај бродските компании и осигурителите.
Ормускиот Теснец е едно од најчувствителните места за светската енергетика, бидејќи низ него минува околу една петтина од глобалната трговија со нафта и течен природен гас. Токму затоа и мал застој во пловидбата веднаш се одразува врз цените, осигурувањето, транспортот и нервозата на пазарите.
Дополнителен проблем е што примирјето не е спорно само околу пловидбата, туку и околу неговиот опфат. Иран тврди дека израелските напади врз Либан не можат да бидат одвоени од договорот, додека САД и Израел сметаат дека Либан не е дел од актуелниот аранжман. Токму ова несогласување е една од главните причини зошто прекинот на огнот уште од старт изгледа нестабилно.
Во меѓувреме, иранската страна најавува ограничен режим за пловидба, според кој дневно би можеле да поминуваат најмногу 15 бродови. Дури и ако тоа се реализира, станува збор за број далеку под вообичаеното ниво, што значи дека целосно нормализирање на сообраќајот не е на повидок.
