Вонредна седница на Советот за одбрана за денеска попладне свика унгарскиот премиер Виктор Орбан откако српските власти пронајдоа експлозиви и средства за нивно активирање на критичната гасна инфраструктура што ги поврзува Србија и Унгарија.
Орбан објави на социјалните мрежи дека имал телефонски разговор со српскиот претседател Александар Вучиќ.
„Тукушто го завршив телефонскиот разговор со српскиот претседател Александар Вучиќ. Српските власти пронајдоа моќна експлозивна направа и средства за нејзино активирање на критичната гасна инфраструктура што ги поврзува Србија и Унгарија. Истрагата е во тек. Свикав вонреден совет за одбрана за денеска попладне“, напиша Орбан на својот Фејсбук профил.
Претходно денеска и Вучиќ објави дека разговарал со Орбан за првите резултати од истрагата на српските воени и полициски власти во врска со заканата за критичната гасна инфраструктура што ги поврзува Србија и Унгарија и објави дека се пронајдени експлозиви со разорна моќ и фитили потребни за нивно активирање.
