Лидерот во вештачката интелигенција, OpenAI, вчера го најави најновиот модел на GPT-4.5. Извршниот директор на OpenAI, Сем Алтман, го опиша новиот модел како „огромен“ и „скап“. Тој додаде дека „делува како да разговараш со личност која размислува“.
OpenAI во документот кој го опишува новиот четбот го нарекува GPT-4.5 својот „најголем и најинформиран модел досега“, нагласувајќи дека интеракцијата со него делува поприродно.
Компанијата наведува дека новиот модел поседува поширока база на знаење, подобра емоционална интелигенција и подобрено разбирање на контекстот, што го прави исклучително погоден за решавање проблеми, пишување и програмирање.
Исто така, се нагласува дека GPT-4.5 има помалку „халуцинации“. Тоа е вообичаен израз за случаите кога моделите на вештачка интелигенција даваат неточни одговори.
Според документот, GPT-4.5 е повеќе од 10 пати поефикасен во компјутерската обработка во споредба со својот претходник GPT-4. Може да решава проблеми со помала потрошувачка на време и ресурси.
GPT-4.5 е моментално достапен само за корисниците кои се претплатени на ChatGPT Pro. Тоа е план од 200 долари месечно кој овозможува највисок нивое на пристап до производите на OpenAI.
Алтман на мрежата X објави дека OpenAI сакал новиот модел истовремено да го лансира и на ChatGPT Plus и ChatGPT Pro плановите. Но, тоа не било можно поради недостатокот на графички процесорски единици (GPU) кои се потребни за поддршка. Тој додаде дека ќе се додадат десетици илјади GPU-ови следната недела. Тогаш GPT-4.5 ќе стане достапен и во рамките на ChatGPT Plus планот, кој чини 20 долари месечно.
Објавувањето на GPT-4.5 доаѓа по помалку од две години откако OpenAI го лансираше GPT-4. И само неколку недели откако компанијата ја претстави „Операторот“. Тоа е АИ асистент дизајниран за извршување задачи на интернет, како што се нарачување намирници, купување билети и преземање предавања.
OpenAI исто така планира нова рунда на финансирање, која би можела да ја удвои неговата вредност на неверојатни 340 милијарди долари. Ако ова се реализира, оваа рунда би го поставила OpenAI далеку над конкурентите како што се компанијата xAI, во сопственост на Илон Маск (чија вредност е проценета на околу 50 милијарди долари) и фирмата Anthropic, која ја поддржува Amazon и која моментално вреди 18 милијарди долари, а наводно преговара за нова рунда на финансирање која би ја подигнала на 60 милијарди долари.
