Историјата на олимпискиот оган датира уште од античка Грција. Свети огнови се одржувале во храмовите, вклучително и на олтарот на Хера во Олимпија. Според митологијата, огнот симболизира божественото присуство, а секои четири години во античките Олимписки игри се палеел нов оган за да ѝ се оддаде почит на Зевс и другите богови.
Модерната традиција на олимпискиот пламен започнува во 20. век. Првиот официјален пламен се појавува на Летните Олимписки игри во Амстердам во 1928 година, но идејата за штафета со факели, односно пренос на оганот преку земји, е воведена на Олимпијадата во Берлин во 1936 година. Ова практично покажува дека пренесувањето на оганот има политички и културни корени, бидејќи тогашната нацистичка Германија ја користела идејата за врска со античките олимписки вредности.
Оваа година, Грција слави јубилеј што речиси не може да се опфати со ум: 2.800 години од првите антички игри и 129 години од првата модерна Олимпијада во Атина, 1896. Екипата на Трн имаше можност на биде присутна на целиот настан.
Во традиционалната церемонија, огнот годинава за Зимските олимписки игри Милано–Кортина 2026, се запали на 26 ноември во древна Олимпија пред рушевините на храмот на Хера со помош на параболично огледало кое ги концентрира сончевите зраци. Актерки облечени според античките облеки го оживуваат ритуалот, барајќи благослов од богот Аполон, симболизирајќи чистота, светлина и поврзаност со древната традиција.
Потоа започна деветдневен пренос низ Грција, кој опфаќа околу 2.200 км, низ 23 региони и 36 пречекувања, пред свеченото предавање во Панатинаичниот стадион во Атина на 4 декември.
На церемонијата на палењето на огнот Кирсти Ковентри, Претседателка на Меѓународниот олимписки комитет изјави:
„Тука сме за да го прославиме олимпискиот факел. Ние сме исклучително среќни што денешната церемонија нè потсетува на тоа што е суштината на Олимписките игри. Тие значат обединување на луѓето во една мирољубива конкуренција, во пријателство и во почит. И додека го палиме олимпискиот оган од Милано–Кортина, ќе ја пренесеме оваа светлина од минатото во сегашноста и ќе ја продолжиме во иднината. А тоа е заедничка иднина што сите сакаме да ја видиме.“
На 4 декември, пламенот официјално ќе биде предаден на организацискиот комитет на Милано–Кортина. Од таму започнува 63-дневната штафета низ Италија, која опфаќа 60 градови, сите 110 провинции и вкупно околу 12.000 км. Факелот ќе го носат 10.001 носител, симболизирајќи вклучување и заедништво.
Маршутата низ Италија е внимателно избрана, поминувајќи покрај историски и културни знаменитости – од Колосеумот во Рим, каналите на Венеција, до Амалфијската обала. Пламенот ќе биде во Неапол за Божиќ и во Бари за Новата година, за на 26 јануари 2026 да стигне во Кортина д’Ампецо, токму 70 години по првото одржување на Зимските олимписки игри таму. Церемонијата на отворање на 6 февруари 2026 ќе биде во Сан Сиро, Милано.
Претседателот на Олимпискиот комитет на Грција, Исидорос Кувелос, ја истакнува симболиката на пламенот:
„Сите сме тука заедно повторно за една светлина што не ѝ припаѓа само на една нација, туку на целото човештво. Спортот може да биде мост, може да биде сила посилна од силите што се обидуваат да нè разделат. Во овој момент од историјата, олимпиското движење стои цврсто. Тоа продолжува со истата мисија што започна овде пред 2.800 години — да му покаже на човештвото пат кон хармонија, почит и мирољубив соживот.“
Патувањето на пламенот не е само ритуал или спектакл. Тој носи порака за единство, мир, солидарност и спортско пријателство, поврзувајќи древната историја со модерните олимписки вредности. Големиот број носители ја нагласува идејата дека секој човек може да биде дел од олимписката мисија и да пренесе светлина, надеж и инспирација.
Овој симбол на човечките идеали го обединува минатото, сегашноста и иднината: од храмовите на Олимпија, преку градовите и провинциите на Италија, до модерен стадион во Милано. Олимпискиот оган потсетува дека спортот може да ги обедини луѓето надвор од национални и културни граници и дека неговата порака е вечна.
Со палењето на пламенот, Зимските олимписки игри Милано–Кортина 2026 започнуваат со светлина што го поврзува целиот свет, од минатото до иднината, симболизирајќи надеж, пријателство и вечната љубов кон олимписките идеали.
