Украина започна напади со дронови врз рафинерии во два руски региони кои се наоѓаат во близина на реката Волга, продолжувајќи ја својата офанзива против енергетската инфраструктура од витално значење за руската економија.
Гувернерот на Волгоградската област, Андреј Бочаров, соопшти дека градот Волгоград, метропола со еден милион жители, бил цел на напад претходната ноќ, при што остатоците од беспилотните летала предизвикале помала штета на неколку резиденцијални објекти.
Рафинеријата во Волгоград се смета за една од најзначајните рафинерии за нафта во Русија и претрпе штети во претходните напади.
Претходно, шефот на соседната република Башкортостан, Радиј Хабиров, објави на Телеграм дека две украински беспилотни летала го нападнале рафинерискиот и петрохемиски комплекс на „Газпром Нефтехим Салават“.
“Го проценуваме обемот на штетата. Моментално го гасиме пожарот. Сите (служби за итни случаи) се на самото место,” наведе Хабиров.
Руската армија објави дека пресретнала 43 украински дронови претходната ноќ, вклучувајќи околу десет во областа на Волгоград.
