Опозициските парламентарни партии во Србија за денеска закажаа протест пред зградата на српската влада поради трагедијата на железничката станица во Нови Сад, во која загинаа 14 лица.
Барањата што ги покренаа демонстрантите се оставки на премиерот Милош Вучевиќ и градоначалникот на Нови Сад Милан Ѓуриќ, декласификација на договорите поврзани со реконструкцијата на железничката станица во Нови Сад, апсење на одговорните за трагедијата и вонредната контрола на сите инфраструктурни проекти што се започнати или на кои се работи во изминатите 10 години.
На 1 ноември 14 луѓе загинаа, а тројца беа тешко повредени кога се урна бетонската настрешница на железничката станица во Нови Сад.
Оставка досега поднесе само министерот за градежништво, транспорт и инфраструктура, Горан Весиќ, но тој рече дека не ја презема вината за трагедијата.
Во вторникот, за време на протестот во Нови Сад, мирниот марш се претвори во општ хаос во центарот на градот.
Групи маскирани млади ја оштетија зградата на локалниот штаб на владејачката Српска напредна партија, врз која граѓаните претходно фрлаа црвена боја.
Искршени се вратата и прозорците на градското собрание.
Извор: МИА
