Комерцијалните авиокомпании ширум светот се соочуваат со нови тешкотии, додека го преиспитуваат времетраењето на суспензијата на летовите кон и преку Блискиот Исток, откако САД извршија воздушни напади врз ирански нуклеарни објекти, а Техеран се закани со одмазда.
Небото од Иран и Ирак до Медитеранот, кое обично е едно од најпрометните воздушни коридори, веќе десет дена е речиси целосно празно од цивилен сообраќај. Причина: зголемени безбедносни ризици и затворање на воздушен простор, откако Израел ги започна нападите на 13 јуни.
Неколку големи авиопревозници веќе ги откажаа или одложија летовите кон регионот, вклучително и кон најпрометната аеродромска дестинација — Дубаи.
Некои летови продолжуваат, но со големи отстапувања
Иако некои меѓународни компании продолжија со летови во понеделникот, најчесто летаат преку Каспиското Море (на север) или преку Египет и Саудиска Арабија (на југ), за да го избегнат конфликтниот регион.
Овие заобиколни рути ја зголемуваат потрошувачката на гориво, времето на летање и трошоците за екипаж, а дополнително растат и цените на млазното гориво — заради скокот на нафтата по нападите.
Нов ризик: GPS-поместувања и лажни сигнали
Flightradar24 забележа нагло зголемување на GPS пречки и лажни сигнали над Персискиот Залив.
Швајцарската компанија SkAI објави дека во рок од 24 часа регистрирала над 150 „лажни авиони“, што претставува голем ризик за безбедноста на авионите.
Организацијата Safe Airspace предупреди дека нападите на САД може да ја зголемат опасноста за американски и сојузнички авиони, особено во воздушниот простор над Бахреин, Кувајт, Оман, Катар, Саудиска Арабија и ОАЕ.
Израел ја зголемува фреквенцијата на летови
И покрај тензиите, локалните авиопревозници во Јордан, Либан и Ирак продолжуваат со дел од летовите.
Израел, пак, го зголемува бројот на летови, особено таканаречени „летови за евакуација“. Аеродромските власти најавија до 24 вакви летови дневно, со ограничување од само 50 патници по лет.
Израелската авиокомпанија El Al соопшти дека за еден ден добиле над 25.000 барања за напуштање на земјата.
