Танкер е погоден со засега непознат проектил во близина на брегот на Доха, соопшти UK Maritime Trade Operations.
Според првичните информации, бродот бил погоден од левата страна, при што е оштетен трупот над водната линија. Сите членови на екипажот се безбедни, а засега нема пријавено загадување на животната средина.
Надлежните служби започнале истрага за инцидентот.
Втор напад за два дена
Овој инцидент следува само еден ден по нападот врз друг танкер, кој превезувал околу два милиона барели нафта од Кувајт и Саудиска Арабија, а бил погоден со дрон додека бил закотвен во близина на Дубаи.
Тогаш избувнал пожар кој подоцна бил изгаснат, без повредени лица.
Војната се проширува и на морето
Конфликтот меѓу САД, Израел и Иран трае повеќе од еден месец и сè повеќе се прелева и на поморскиот сообраќај.
Особено е погоден Ормуски теснец, клучна рута низ која поминува значителен дел од светската нафта.
Иран одговори на нападите врз негови цели со проектили и дронови насочени кон американски бази, Израел и земјите од Персискиот Залив.
И покрај повремените сигнали за можни преговори, засега ниту една страна не покажува подготвеност за брзо завршување на конфликтот, додека инцидентите на море дополнително ја зголемуваат загриженоста за глобалното снабдување со енергенси.
