Воздушниот сообраќај на аеродромот во Хановер беше привремено прекинат во вторник навечер, откако пилот пријавил забележан дрон во близина на пистата, потврди германската полиција.
Аеродромот бил затворен од 22:00 до 22:45 часот, а три авиони биле пренасочени, соопшти полициски портпарол за агенцијата dpa.
Според првичните информации, дронот летал над индустриска зона во близина на аеродромот. Еден од пренасочените авиони пристигнувал од Франкфурт, но морал да слета во Хамбург. Останатите летови успеале да слетаат и полетаат, но со помали доцнења.
Слични случаи низ Германија
Во последните неколку дена, серија слични инциденти со дронови го нарушија воздушниот сообраќај и во други германски градови.
Во Бремен, летовите беа стопирани речиси час време во неделата, додека во петок навечер аеродромот Берлин–Бранденбург бил затворен околу два часа поради ист тип на инцидент.
Зголемен безбедносен ризик
Германските власти предупредуваат дека дроновите претставуваат сериозна закана во близина на аеродроми, бидејќи можат да го загрозат полетувањето и слетувањето на авиони.
Според dpa, контролата на германскиот воздушен сообраќај годинава евидентирала повеќе инциденти со дронови, особено на аеродромите во Бремен и Хановер.
Полицијата во Хановер спроведува истрага за идентификација на лицето што управувало со дронот и потеклото на леталото.
