Израелскиот премиер Бенјамин Нетанјаху изјави дека протестите на израелски граѓани кои бараат прекин на војната во Појасот Газа и договор за ослободување на заложниците — само ја зајакнуваат позицијата на Хамас. Оваа изјава ја даде во неделата за време на неделниот состанок на владата.
„Оние кои денес повикуваат на прекин на војната без пораз на Хамас, не само што ја зајакнуваат таа терористичка организација и го одложуваат ослободувањето на нашите заложници, туку и гарантираат дека ужасите од 7 октомври ќе се повторат — и тоа постојано, и ќе водиме бескрајна војна,“ порача Нетанјаху.
Во неделата, илјадници демонстранти излегоа на улиците на израелските градови, барајќи договор за прекин на огнот кој би вклучувал и ослободување на заложниците што беа киднапирани за време на нападот на Хамас на 7 октомври 2023 година. Токму тој напад беше иницијална искра за актуелниот вооружен конфликт помеѓу Израел и Хамас.
Демонстрантите, меѓу кои има и семејства на заложници, бараат итна дипломатска иницијатива за ставање крај на судирот и спасување на животите. Сепак, владата на Нетанјаху останува цврста во ставот дека целосна победа над Хамас е предуслов за било каков договор или прекин на огнот.
